زیر نظر کتاب پاکستان کی ریاست، طرزِ سیاست ، اداروں کے طرزِ عمل اور عوامی مزاج کے بارے میں مصنف سلمان عابد کے تجزیے پر مشتمل ہے۔ پاکستان میں جمہوری نظام کی ناکامی، سیاست کے بحران ، سیاست پر جرائم پیشہ اور مافیاز کے کنٹرول،مذہبی انتہاپسندی اور دہشت گردی،پاکستان کی سیاسی جماعتوں کے داخلی تضادات، چھوٹے صوبوں کے احساسِ محرومی اور صوبائی خود مختاری،سیاسی جماعتوں کی محاذ آرائی اور طلبہ سیاست کو بھی موضوعِ بحث بنایا گیا ہے۔ اس کے علاوہ کتاب میں ذوالفقار علی بھٹو کے عدالتی قتل سے پاکستان کی سیاست پر پڑنے والے اثرات کا بھی جائزہ لیا گیا ہے، نیز پاکستان میں فوجی حکمرانی کا تاریخ اور عدلیہ اور سول سوسائٹی کے کردار پر بھی روشنی ڈالی گئی ہے۔ مصنف نے پاکستان میں شفاف انتخابات کی ضرورت اور انتخابی تاریخ کا بھی جائزہ لیا ہے اور بتایا ہے کہ فیصلہ سازی کے عمل میں عوام کی عدم شمولیت، محروم طبقات کی سیاست میں ناکامی اور فکری کرپشن بھی بحران کی ایک وجہ ہے۔